Оқушыларымен 7-сыныптан бастап кәсіптік бағдар беруші маман жұмыс істейді

Елде студенттерге кәсіби тәжірибе жинақтауға көмектесетін 100 шағын кәсіпорын құрылады, деп мәлімдеді премьер-министрінің орынбасары Ералы Тоғжанов. 

"7-сыныптан бастап мамандық таңдауға баулитын "педагог-кәсіптік бағдар беруші" маманы енгізіледі. Сонымен қатар колледждер жанынан студенттерге тәжірибе жинақтауға мүмкіндік беретін 100 шағын кәсіпорын құрылады", – деді Ералы Тоғжанов. 

Ары қарай премьер-министр халықтың әлеуметтік осал топтарының тұрақты табысын қалыптастыру үшін қандай кешенді жұмыстар жүргізілетінін түсіндірді. 

---

Оқи отырыңыз: Атырауда мектеп басшылығы оқушылар төбелесін жасырып келген

---

"Атап айтқанда 160 мың жас азамат "Жастар практикасы", "Алғашқы жұмыс орны" жобаларымен, 400 айлық есептік көрсеткіш көлемінде гранттармен қамтылатын болады. Бұдан өзге "Бақытты отбасы" жобасы аясында 20 мың көп балалы ана мен мүгедек балаларды тәрбиелеп отырған аналар біліктілігін арттырып, үйден шықпай-ақ табыс табуға мүмкіндік жасалады", – деді Ералы Тоғжанов. 

Қазір елде 440 мың көп балалы ана, 92 мың мүгедек бала бар.

Аталған жоба аясында әйелдер еңбек нарығында сұранысқа ие 10 мамандық бойынша қысқа курстан өтіп, өз ісін ашу бойынша тегін консультация алады. 

"Былтыр осындай жоба Нұр-Сұлтан қаласында іске асырылды. Жоба арқылы 1500 әйел оқудан өтіп, 800-ден аса қатысушы кәсібін ашты", – деді премьер-министрдің орынбасары.