Оңтүстік Кореяның экс-президенті Юн Сок Ёль өмір бойына сотталды

Оңтүстік Корея соты елдің бұрынғы президенті Юн Сок Ёльге үкім шығарды. Сот оны "билікті асыра пайдалану" және 2024 жылғы желтоқсанда "бүлік ұйымдастыру" баптары бойынша кінәлі деп танып, өмір бойына бас бостандығынан айыру жазасын тағайындады. Бұл туралы Yonhap агенттігі хабарлады.

Айта кетейік, бұған дейін прокуратура экс-президентті өлім жазасына кесуді сұраған болатын. Сот барысында Юн Сок Ёльдің 2024 жылғы әрекеттері либералды-демократиялық конституциялық құрылымды бұзып, Ұлттық жиналыс пен Сайлау комиссиясының жұмысына нұқсан келтіргені дәлелденгені айтылды. Юн Сок Ёль өз кінәсін мойындаған жоқ.

Ол әскери жағдай енгізуді "президенттік өкілеттік" деп атап, бұл шешімді оппозицияның үкімет жұмысына кедергі келтіруімен байланыстырды.

Қазіргі уақытта экс-президент Сеул қаласындағы тергеу изоляторында отыр.