Қазақстанда өнер, ойын-сауық және демалыс саласында жұмыс істейтін азаматтар ең төмен жалақы алады. 2021 жылдың ІІІ тоқсанында сектордағы орташа жалақы 162,6 мың теңгені құрады. Бұл Қазақстан бойынша орташа жалақыдан үш есе төмен, деп хабарлады Finprom.kz сайты.
Алайда осы жылдың ІІ тоқсанында өнер саласындағы жалақының сатып алу мүмкіндігі 1,7% өсті. Ал жалпы Қазақстан бойынша керісінше 5,1% төмендеген еді.
Оқи отырыңыз:
- 2021-2023 жылдары мұғалім жалақысы қалай өседі? Қосымша ақы мөлшері қандай?
- "Жамбыл өңірі орташа айлық жалақы бойынша 16-орында". Қордай қақтығысына әлеуметтік-экономикалық талдау
2021 жылдың ІІІ тоқсанының қорытындысы бойынша, өнер, ойын-сауық және демалыс саласындағы қызметкерлердің саны 69,9 мың адамға жетті. Бұл І тоқсандағы көрсеткішпен салыстырғанда 3,2% аз, ал өткен жылмен салыстырғанда 0,3% аз.
2021 жылдың қаңтар-қыркүйек айларында өнер, ойын-сауық және демалыс секторындағы қызметтер көлемі 33,2 млрд теңгені құрады. 2020 жылдың осы кезеңімен салыстырғанда 9,7% аз. Ал коронавирустық пандемия басталған кезеңге дейінгі уақытпен салыстырғанда 16,4% төмен.
Еске салсақ, қай салада миллион теңгеден артық жалақы алуға болатыны туралы хабарлаған едік. Еңбек ресурстарын дамыту орталығы Қазақстанның еңбек нарығы туралы алғашқы ұлттық баяндаманы әзірледі.
