Олжас Бектенов Солтүстік Қазақстан облысындағы Сергеев су торабына барды

Премьер-министр Солтүстік Қазақстан облысындағы Сергеев су торабына барды, сонымен қатар Петропавл қаласында 1-ші көтергіш сорғы стансасы мен бөгеттің бекінісін реконструкциялау барысын тексерді, деп хабарлайды үкіметтің баспасөз қызметі.

Өткен жылғы су тасқыны кезінде Сергеев су торабының төменгі саласындағы топырақты сел шайып кеткен болатын. Петропавл су торабына зақым келген жоқ. 

"2024 жылы үкімет республикалық бюджеттен гидротехникалық нысандарды ағымдағы жөндеуге және Сергеев пен Петропавл су тораптарында су тасқынына қарсы іс-шараларды жүргізуге 278,5 миллион теңге бөлді. Жағалауларды бекіту үшін бұл нысандарға 1,4 мың м3-тен астам ірі кесек тастар әкелінді, Сергеев су құрылысы бөгетіне жақын төменгі саласына түбін тереңдету жұмысы жүргізілді, 940 м3 топырақ қоспасы қазып алынды", – деп жазылған хабарламада.

"Қазсушар" РМК Солтүстік Қазақстан филиалының директоры Шұғайып Ибатуллин қазіргі уақытта екі су торабы да қанағаттанарлық жағдайда және штаттық режимде жұмысын жалғастырып жатқанын баяндады. Биыл қосымша 14 іс-шара өткізу жоспарланып отыр. Ал "Қазгидромет" филиалының басшысы Қымбат Мерғалимова жауын-шашын мөлшері әсіресе, оңтүстік және шығыс аудандарда нормадан көп болатынын айтты. Сергеев су қоймасынан төмен орналасқан аудандар үшін су тасқыны қаупі жоғары болып қала береді.

"Сергеев су торабы – су тасқыны қаупі бар аймақтағы стратегиялық нысан, тұрғындарды сумен қамтамасыз етуге де жауапты. Егер судың толу деңгейі 2 метрден асатын болса, орталыққа және жеке маған шұғыл хабарлауды тапсырамын", – деді Олжас Бектенов.

Өңірдегі су шаруашылығы объектілерін нығайтуды жалғастыру, сонымен бірге цифрлық шешімдерді белсенді енгізу, батиметриялық түсірілім жүргізу тапсырылды.