Не айтылғаны маған қызық емес – Тоқаев экс-президенттің Мәскеуге сапары туралы

Мемлекет басшысы Қасым-Жомарт Тоқаев "Түркістан" газетіне берген сұхбатында экс-президент Нұрсұлтан Назарбаевтың Ресей басшысы Владимир Путинмен кездесуі туралы сауалға жауап берді. 

Президенттің сөзінше, мұндай кездесулер бейресми сипатқа ие. 

"Тұрақты түрде өткізіліп жүрген кездесулер бейресми сипатқа ие. Мұны Ресей президентінің өзі де атап өтеді. Таяуда өткен Санкт-Петербургтегі басқосуда Владимир Путин маған Нұрсұлтан Назарбаевты оның өтініп сұрауы бойынша қабылдайтынын айтқан еді. Ресей президентінің ерекшелігі: ол достарымен және әріптестерімен жылы қарым-қатынас құра біледі. Жұмысы өте қарбалас болса да, сенбі күні Қазақстанның Тұңғыш президентімен асықпай әңгімелесуге уақытын бөлді. Ол Нұрсұлтан Назарбаевты Еуразиядағы ықпалдастық үдерісінің бастауында тұрған тәжірибелі саясаткер ретінде бағалайды. Ресей бұл үдерісте жетекші рөл атқарып отыр. Кремльдегі кездесу Владимир Путиннің адамгершілігі жоғары екенін көрсетеді", – деді Қасым-Жомарт Тоқаев. 

Сондай-ақ, президент, мұндай әңгімелер барысында не айтылғаны өзіне қызық емес екенін және бұл туралы ешқашан сұрақ қоймайтынын атап өтті. 

"Ал, Нұрсұлтан Назарбаевтың жеке басына келер болсақ, мен оны қазіргі қазақ мемлекеттігінің негізін қалаған тұлға деп санайтынымды бірнеше рет айттым. Оның мемлекеттік институттарды және экономиканың нарықтық тетіктерін құру, жаңа астанамызды салу жолындағы еңбегін бәрі біледі. Өзіңізге мәлім, біз Қазақстанды Әділдік, Заң және Тәртіп орнаған ел еткіміз келеді. Сондықтан, ешкімді алаламай, әр азаматтың еңбегін әділ бағалау керек. Бұл еліміздің Тұңғыш президенті Нұрсұлтан Назарбаевқа да қатысты", – деді президент.