Наиб мүфти: Діни басқарма лаңкестер мен содырлардың теріс әрекетін айыптайды

"Дәл қазір ең маңыздысы – елдің ауызбіршілігін сақтау. Ел амандығын тілеп, алауыздыққа жол бермеу. Жаңа ғана Мемлекет басшысының халыққа үндеуін тыңдадым, Қазақстан мұсылмандары діни басқармасы ел қамы үшін қабылдаған Президент шешімін толық қолдайды. Қасым-Жомарт Тоқаев ел ертеңіне қатысты түйткілді жайттар мен оны шешу жолдарына тоқталып өтті. Өздеріңіз білетіндей, қауіпсіздікті сақтау мақсатында төтенше жағдай кезінде мешіттер де жамағат болып намаз оқуға, басқа да діни шара ұйымдастыру уақытша тоқтатылды. Осы орайда жұртшылық жағдайға түсіністікпен қараса екен деймін. Өйткені, төтенше жағдай ережесіне бағыну маңызды", – деді Ершат Оңғар.

Наиб мүфтидің сөзінше, Қазақстан мұсылмандары діни бірлестігі елде бүліктің болуын қолдамайды және халықты сабырға шақырады.

"Елдегі болып жатқан жайт, өркениетті Қазақстанның демократиялық қағидатына кереғар және ойран салу, арандатушылыққа алып бару мұсылманға тән емес әрекет. Біздің басқарма лаңкестер мен содырлардың теріс әрекетін айыптайды", – деді ол.