Милан-Кортина Олимпиадасы: Қазақстанның намысын 18 ер мен 18 әйел спортшы қорғайды

Қазақстан XXV қысқы Олимпиялық ойындарға 36 спортшымен қатысады. Бұл туралы Спорт және дене шынықтыру істері комитеті хабарлады.

Төртжылдықтың басты бәсекесі 2026 жылғы 6–22 ақпан аралығында Италияның Милан және Кортина-д’Ампеццо қалаларында өтеді.

Қазақстан қысқы Олимпиадаға тоғызыншы рет қатыспақ. Милан–2026 ойындарының басты ерекшелігі – гендерлік теңдік қағидатының сақталуы. Қазақстан құрамасы сапында 18 ер адам мен 18 әйел спортшы бақ сынайды. Бұл 2022 жылғы Бейжің Олимпиадасымен салыстырғанда екі спортшыға көп.

Аталған Олимпиада Пхёнчхан-2018 ойындарының қола жүлдегері, фристайл-могулдан Юлия Галышева үшін бесінші Олимпиада болмақ. Сондай-ақ шорт-тректен Абзал Ажғалиев пен Денис Никиша Олимпиадаға қатарынан төртінші рет қатысады.

Қазақстан құрамасында бұдан бөлек фигуралық сырғанаудан әлем чемпионатының күміс жүлдегері Михаил Шайдоров пен фристайл-могулдан әлем чемпионаттарының екі дүркін қола жүлдегері Анастасия Городко да бар.

Қазақстандық спортшылар 10 спорт түрінен бақ сынайды. Құрамадағы 36 спортшының 18-і Олимпиадаға алғаш рет қатысады.

Ең жас спортшы — 16 жастағы Асан Асылхан, ол фристайл-акробатикадан өнер көрсетеді. Оның қоржынында Азия ойындарының күміс медалі бар.