Мемлекет басшысы: Еркіндік деген ойыңа не келсе, соны айту емес

Президент Қаңтар оқиғасы кезінде лаңкестер мен қылмыскерлер өз мүддесіне пайдаланбас үшін интернетті бұғаттауға мәжбүр болғанын айтты. Сондай-ақ, ол қазақстандық баспасөзде цензура жоқ екеніне тоқталды. 

"Жалпы, қазақ журналистикасының деңгейі төмен деп айтуға болмайды. Керісінше қазақ журналистикасының деңгейі жоғары екені күмәнсіз. Қаңтар оқиғалары кезінде ақпараттық вакуум болды. Оны кәсіби тұрғыда дайындалған лаңкестер, қылмыскерлер өз мүддесіне пайдаланды. Интернетті бұғаттауға мәжбүр болдық. Бұл – әлемдік практика. Бірақ, басқа да ақпарат құралдарымыз бар ғой. Содырлар кейбір теле-радио арналардың ғимаратын өртеп, қиратты. Одан басқа ақпарат құралдары үздіксіз хабар таратты. Ешқандай шектеу болған жоқ. Ал баспасөз бостандығына келсек, бізде заң бойынша цензура жоқ. Ақпарат еркіндігін барынша қамтамасыз етіп жатырмыз. Бірақ, еркіндік деген ойыңа не келсе, соны айту емес. Кез келген демократиялық елдерде жалған ақпарат таратқан адам жауапқа тартылады. Мен әрбір журналист, ең алдымен, мемлекетшіл азамат болуы керек деп санаймын. Осы орайда Некрасовтың: "Ақын болу шарт емес, азамат болу – міндетің" деген қанатты сөзі бар. Сондықтан әрқайсымыз еліміздің патриоты болуға тиіспіз", – деді Қасым-Жомарт Тоқаев. 

Әрі қарай президент кейбір журналистің жалған ақпарат жазатынын алға тартты. Сондай-ақ, блогерлерді сынға алды. 

"Қазақтың "Айтылған сөз – атылған оқ" деген даналығы бар. Осы ретте, өкінішке қарай, кейбір журналистер жалған ақпарат таратып, елдің мүддесіне қарсы жұмыс істейді. Қазіргі заманда блогерлер көбейіп кетті. Олардың кейбір әрекеттері кері әсер етеді. Бір блогерлер жақсы жазады. Ал екінші біреулері мәселенің байыбына бармай, зерттемей, үстірт қарайды. Дегенмен, азаматтарымыз ақ пен қараны ажырата алады деп ойлаймын. Расында, ақпараттық "соғыс" бүкіл әлемде болып жатқан үрдіс. Сондықтан, біз де оған бейімделуіміз керек", – деді президент. 

Еске салсақ, Тоқаевтың жаңа саяси реформаларды күзде емес, наурыздың ортасында халыққа жолдауында ұсынатынын айтқаны туралы хабарлаған едік.