Коронавирус Қазақстанның 15 өңірінде күш алды

Қазақстанда соңғы апта ішінде 1283 адам коронавирус жұқтырған. Бұл өткен апта көрсеткішінен 282-ге артық. Бұл туралы денсаулық сақтау министрі Ажар Ғиният ведомствоаралық комиссияның отырысында хабарлады.

"Қараша айының басынан бастап республикада КВИ-мен сырқаттанушылықтың өсуі байқалады, тәулігіне "КВИ+"-дің 235 дейінгі жағдайы және "КВИ-"-тің 40 дейінгі жағдайы тіркеледі. Соңғы аптада сырқаттанушылық 21%-ға -аптасына 1001 жағдайдан 1283 жағдайға дейін өсті", - деді Ажар Ғиният.

Қазақстанның 15 өңірінде инфекцияның таралу қарқыны артқан. Ең көп таралған штамм – Омикрон штамы.

Республика бойынша инфекциялық төсектердің жұмыспен қамтылуы – 13 пайызды (2136 төсектің 296-сы), реанимациялық төсектердің – 3 пайызын (352 төсектің 12-сі) құрайды.

"Тиісті контингентті уақтылы ревакцинациялау бойынша жүргізіліп жатқан жұмыстың жеткіліксіз екенін, бұл халықтың иммунизацияланбаған тобының жинақталуына, аурудың неғұрлым ауыр түрлерін тіркеуге, ал қосалқы аурулар мен өлім-жітім болған жағдайда тіркеуге ықпал ететінініне назар аудару қажет", – деп атап өтті Ажар Ғиният.

Осыған байланысты ЖАО-ға тиісті топтарды ревакцинациялауды және халық арасында ақпараттық-түсіндіру жұмыстарын жандандыруды тапсыруды сұраймын, деп түйіндеді министр Ведомствоаралық комиссияның отырысында.