Көктайғақ пен тұман: Қазгидромет шұғыл ескерту жариялады

"Қазгидромет" синоптиктері 2026 жылғы 2 ақпанға арналған шұғыл метеорологиялық ескерту жариялады. Еліміздің басым бөлігінде көктайғақ, тұман және екпінді жел күтіледі.

Синоптиктердің мәліметінше, оңтүстік және батыс өңірлерде ауа райы күрт құбылады. Жамбыл және Түркістан облыстарының таулы аймақтарында жаңбыр мен қар аралас жауын-шашын түсіп, тұман мен көктайғақ болады. Желдің екпіні 15–20 м/с-қа дейін күшейеді.

Маңғыстау, Атырау және Батыс Қазақстан облыстарында түнгі және таңғы уақытта тұман мен көктайғақ күтіледі. Ақтау, Атырау және Орал қалаларында жолдардың тайғақ болуы ықтимал. Қызылорда облысында да тұман мен көктайғақ сақталады.

Республиканың солтүстік, орталық және шығыс өңірлерінде қысқы метеорологиялық құбылыстар күшейеді. Павлодар мен Ақмола облыстарында қар жауып, жаяу боран соғады, желдің жылдамдығы 20 м/с-қа дейін жетуі мүмкін.

Қарағанды және Ұлытау облыстарында тұман түсіп, көктайғақ қаупі жоғары. Қарағанды мен Жезқазған қалаларында көріну деңгейі төмендейді. Солтүстік Қазақстан, Қостанай және Шығыс Қазақстан облыстарында да қою тұман күтіледі. Петропавл, Қостанай және Өскемен қалаларында түнгі және таңғы уақытта жол қозғалысы қиындауы мүмкін.

Синоптиктер тұрғындарды сақтық шараларын күшейтіп, алыс жолға шыққанда ерекше мұқият болуға шақырады.