"Көйлек пен көлік жарысы". Ринат Зайытов мектеп бітіру кештерін заңмен тоқтатуды ұсынды

Ринат Зайытов мектеп бітіру кештерін өткізуді заңмен тоқтатуды ұсынды. Бұл туралы депутат Мәжіліс кулуарында Информбюро тілшісінің сауалына берген жауабында айтты.

Қазақстанның Оқу-ағарту министрлігі мектеп бітіру кештерін мектептен тыс жерде өткізуге тыйым салған. Осыған қарамастан оқу жылының соңында мейрамханалар бос емес - барлығы брондалып қойылған. 

Депутаттың пікірінше, мұндай кештерді заңмен қатаң реттеу қажет. Себебі олар оқушылар арасындағы әлеуметтік теңсіздікті күшейтеді.

"Мектеп бітіру кештері түлектердің психологиясына әртүрлі әсер етеді. Кейде бәрі көйлек пен көлік жарысына айналып кетеді. Біреулердің ата-анасының оған шамасы жетпейді, тіпті несие алуға мәжбүр болатындар бар. Сондықтан мұндай тәжірибені тоқтату керек деп ойлаймын", – деді ол.

Ринат Зайытов бұл мәселені заңнамалық деңгейде қарастыру қажеттігін атап өтті.