Кино, театр, концертке тегін билет. Коронавирусқа қарсы екпе алған студенттерді қолдау акциясы басталады

Қазақстандық жоғары оқу орындары Білім және ғылым министрі Асхат Аймағамбетовтің тапсырмасы бойынша жоо білім алушылары арасында вакцинацияны қолдау акциясын бастайды. Covid-19 індетіне қарсы екпе алған студенттер жоғары оқу орындарының мүмкіндіктеріне байланысты оқуға, жатақханаларда тұруға жеңілдіктер алып, түрлі сыйлықтарға ие болады, деп хабарлады министрліктің баспасөз қызметі.

Әл-Фараби атындағы ҚазҰУ, Гумилев атындағы ЕҰУ, Абай атындағы ҚазҰПУ, Сәтбаев атындағы ҚазҰТЗУ, Әуезов атындағы ОҚУ, Өтемісов атындағы БҚУ, Досмұхамедов атындағы Атырау университеті вакциналауды қолдау акциялары ұйымдастырылуда. Бірқатар жоғары оқу орнының студенттері үшін оқуға, жатақханаларда тұруға жеңілдіктер, сауықтыру шипажайларына тегін жолдамалар, тегін тамақтану және қоғамдық көлікті пайдалану талондары қарастырылған. 

Сондай-ақ, жоғары оқу орындары вакциналанған студенттер үшін шет тілдері, компьютерлік сауаттылық және кәсіпкерлік дағдыларды дамытатын тегін курстар ұйымдастыруды жоспарлап отыр. Сонымен қатар екпе салдырған кейбір университеттердің студенттері фитнес залдарына, бассейнге, театрға, кинотеатрға және концерттерге тегін бара алады.

Вакцина алған оқытушылар қосымша ақы немесе ақылы демалыс алады.

"Бұл акция біздің азаматтардың санасын оятуға көмектеседі деп сенеміз. Біз бірлесе отырып, қауіпті вирусты жеңе аламыз және карантин мүмкіндігінше тез аяқталады деп үміттенеміз. Басқа жоғары оқу орындарын да вакцинацияны қолдау үшін ынталандыру шараларын ұйымдастыруға шақырамыз", – деді Білім және ғылым вице-министрі Қуаныш Ерғалиев.