Қызылорда мектептерінің бәрінде қоңырау орнына қазақ күйлері ойнайды

Қызылорданың мектептерінде сабақ арасындағы үзіліс кезіндегі соғылатын қоңырау үнін қазақ күйлері алмастырды, деп хабарлады Aikyn басылымы. 

Қызылорда қаласында 50-ге жуық мектеп болса, бүгінде солардың бәрінде үзіліс кезінде күй ойналады. 

"Бұл игілікті бастама бұдан сәл ертерек, яғни, екі-үш жыл бұрын қолға алынған болатын. Осы арқылы жас ұрпақтың бойында рухани құндылығымызды жаңғыртып, ұлтжандылық асыл қасиеттерімізді тереңінен сіңіруіне үлкен негіз қаланды. Бүгінде өңірдегі білім ошақтарының барлығы дерлік қоңырау орнына күй ойнатып, жаңашылдыққа бет бұрды. Мұндай жаңашылдыққа жол бастайтын игі бастамалар алдағы уақытта да жалғасын табатын болады", – дейді Қызылорда облыстық білім басқармасының баспасөз хатшысы Бекбол Қаласов.

Оқи отырыңыз: 

• "Қазақтан бұрын домбыра болған". Домбыраның тарихын білесіз бе?
• Amanat депутаттары Ұлттық домбыра орталығын ашуды ұсынды

Мұғалімдер мен оқушылардың таңдауы көбіне Балбырауын, Адай, Аққу, Ерке сылқым, Әлқисса, Көңілашар, Қош керуен, Дайрабай күйлеріне түседі. Күйлер белгіленген жоспарға сәйкес ауыстырылып отырады екен. 

"Бүгінде қала мектептерінің 100 пайызы қоңырау үнін күймен алмастырды. Күйлер белгіленген жоспарға сәйкес ауыстырылып отырады. Осының нәтижесінде ата-бабамыздан мұра болып жеткен асыл қазыналарымызды оқушылардың санасында жаңғыртып, ұлттық өнерімізді кеңінен насихаттауға мүмкіндік арта түсті", – дейді қалалық білім бөлімінің БАҚ-пен байланыс маманы Жарасхан Қуанышбайұлы.