Көлік салығын қаңтар айына дейін төлемегендердің қарыздары кешірілмек.
Қырғызстанда азаматтар енді көлік салығын төлемейді, деп хабарлады 31 арнаның Информбюро ақпараттық бағдарламасы.
Бұл туралы көрші елдің президенті Садыр Жапаров мәлімдеді.
Ол тиісті жарлыққа қол қойып, бұл төлем түрінен халық босатылатынын айтты. Тіпті, көлік салығын қаңтар айына дейін төлемегендердің қарыздары кешірілмек.
Мемлекет басшысының мұндай шешім қабылдауына "Жол қоры" туралы заңның күшіне енуі себеп болыпты. Демек, жаңашылдыққа сәйкес жанармайдың әр литрі үшін жүргізушілерден бір сом алынады.
Салықтың жаңа түрінен түсетін қаражат жолдарды жөндеуге және күтіп-ұстауға жұмсалатын болады.
