Қостанайда ұлттық лицей ашылды

Қостанай қаласында  "Qazbilim Qostanay" ұлттық лицейі ашылды. Ашылу салтанатына мемлекет және қоғам қайраткерлері, сондай-ақ білім саласының өкілдері қатысты.

"Қостанай қаласында қазақ тілінде білім беретін ұлттық лицейдің ашылғанына өте қуаныштымын. Аятжан Аяхметжанұлының ел біліміне сіңірген еңбегі ұшан-теңіз. Қазақстан бойынша ашылып жатқан үш ұлттық лицейдің біреуі біздің өңірде ашылғаны үлкен мәртебе деп білемін", – деді ардагер ұстаз Қалқаман Хасенұлы.

Айсәуле Дүйсебекова ұлттық лицейдің ашылуына қуанышты екенін жеткізді.

"20 жыл көлемінде қазағы аз Қостанай өңірінде қазақы рухты жастарды тәрбиелеуге үлесімді қосып жүрген ұстаздардың бірімін. Қытай, Моңғлиядан, Алтайдың арғы жағынан келген қандас жастардың бойындағы рухты өз өңірімдегі жастардың бойынан көрсем деп армандайтынмын. Сол арманымыз шынға, қиялымыз, түсіміздегі дүниеміз өңімізге ұлттық мектеп болып келіп жатыр", – деді ұстаз Айсәуле Дүйсебекова.

Шара барысында Қалқаман Хасенұлы Qazbilim білім ордасының құрылтайшысы Аятжан Ахметжанұлына шапан жауып, сый-сыяпатын көрсетті. 

Айта кетейік, қазіргі таңда еліміздің 12 қаласында білім ордасының 17 бөлімі жұмыс істеп тұр.