Қазақстан шетелден автокөлік әкелуді шектемейді

Ақпарат құралдарында жақын шетелден Қазақстанға автокөлік әкелуді шектеу туралы жаңалық жариялануына байланысты ҚР премьер-министрінің баспасөз қызметі түсініктеме берді.

"Бүгінгі таңда шетелдік көлік құралдарын заңнаманы бұза отырып елге әкелу жағдайлары жиілеп кетті. Атап айтқанда, ұрланған немесе кепілге қойылған, жалған нөмір тағылған және тағы басқа автомобильдерді пайдалану фактілері анықталып жатыр. Мәселен, өткен жылы ғана басқа елдердің құқық қорғау органдарымен салыстыру қорытындысы бойынша Қазақстанға әкелінген 35 мыңнан астам автомобильдің банк тарапынан және заң бойынша шектеулері болғаны анықталды" делінген Үкіметтің баспасөз қызметінің хабарламасында. 

Бұдан бөлек, 600-ден астам көлік елге әкелу кезінде ЕАЭО-ға мүше елдердің құқық қорғау органдарының іздестіруінде екені анықталды. Осыған орай, Қазақстанға "проблемалық" автокөліктің әкелінуінің алдын алу мақсатында Көлік құралдарын әкелу ережелері әзірленіп жатқаны белгілі болды. 

Оқи отырыңыз: Шетелде тіркелген көліктер мәселесі қалай шешіледі? Бұл жағдайға кімдер кінәлі?

"Онда мұндай автомобильдер бойынша бақылауды күшейту тетіктері, тіпті оларды елге әкелуді шектеуге дейін көзделетін болады. Бұл ретте аталған шаралар Қазақстан Республикасының аумағына заңнаманы бұзбай әкелінген және пайдаланылатын шет мемлекеттерде тіркелген автомобильдерге қатысты қолданылмайды" делінген хабарламада.