Маңғыстау облысында Қазақстан Қарулы күштерінің Әскери-теңіз күштері оқу-жаттығуы кезінде қайғылы жағдай болды. Каспий теңізінің жағалауында оқу-жауынгерлік міндеттерді орындау барысында ауа райы күрт нашарлап, жел күшейген.
Қорғаныс министрлігінің алдын ала мәліметінше, қолайсыз ауа райы салдарынан теңізге 19 әскери қызметші ағып кеткен.
"Өкінішке қарай, олардың 9-ы қаза тапты. Үш әскери қызметші құтқарылды, олардың біреуі ауруханаға жатқызылды. Қалғандарын іздестіру жұмыстары жүргізіліп жатыр", – деп хабарлады министрліктің баспасөз қызметі.
Оқиға орнына құтқару қызметтерінің күштері мен құралдары дереу жіберілген. Іздестіру-құтқару жұмыстарына Әскери-теңіз күштерінің, Төтенше жағдайлар министрлігінің бөлімшелері, авиация және басқа да тиісті қызметтер жұмылдырылды.
Оқиғаның барлық мән-жайын анықтау және іздестіру-құтқару жұмыстарын үйлестіру үшін оқиға орнына Қорғаныс министрлігінің комиссиясы аттанды. Комиссияға Қазақстанның Қорғаныс министрі, авиация генерал-лейтенанты Дәурен Қосанов басшылық етеді.
Оқиғадан кейін еліміздің Бас прокуратурасы қылмыстық іс қозғалғанын мәлімдеді.
"Ақтау гарнизонында оқу-жаттығу барысында әскери қызметшілердің қаза болу фактісі бойынша қылмыстық іс қозғалып, тергелуде. Жедел-тергеу тобы құрылды. Оқиға орнында Ішкі істер министрлігінің, Төтенше жағдайлар министрлігінің және прокуратура органдарының қызметкерлері жұмыс жүргізуде. Оқиғаның барлық мән-жайларын жан-жақты, толық әрі объективті анықтауға бағытталған тергеу әрекеттерінің кешені жүргізілуде. Қажетті сот сараптамалары тағайындалды. Тергеу барысы ерекше бақылауға алынды", – делінген ресми хабарламада.