2023 жылғы 19 наурызда Қазақстанда Парламент Мәжілісі және мәслихаттар депутаттарын сайлау өтіп жатыр. Мемлекеттік кеңесші Ерлан Қарин Астанадағы №111 сайлау учаскесінде дауыс берді.
"Сайлау жаңа норма, жаңа ережелер бойынша өтіп жатыр. Парламент жаңа норма мен ережелерге ғана емес, басқа да жаңа уәкілеттіліктер бойынша сайланады. Былтыр наурыздағы президент жолдауында сайлауға қатысты реформалар айтылды. Бұл сайлау реформалардың әрі қарай жүзеге асуына мүмкіндік береді деп ойлаймын. Сайлаудан кейін саяси алаң кеңейіп, парламентте жаңа есімдер пайда болады. Мұның бәрі қабылданатын саяси шешімдердің сапасын көтеруге, қоғамдық-саяси тұлғалардың көбеюіне әсер етуі керек. Кандидаттардың көптігі президент реформаларының қоғамда қолдау тапқанын көрсетеді", – деді Ерлан Қарин.
Оқи отырыңыз: Әлихан Смайылов мәжіліс және мәслихаттар депутаттарын сайлауда дауыс берді
Сайлауға жеті партия өз кандидаттарын ұсынды. Олар: "Ақ жол" демократиялық партиясы, Amanat партиясы, "Ауыл" халықтық-демократиялық патриоттық партиясы, "Байтақ" "жасылдар" партиясы, Қазақстан халықтық партиясы, Жалпыхалықтық социал-демократиялық партиясы, Respublica партиясы. Сондай-ақ, осы сайлауда өзін-өзі ұсынғандар да мәжіліс депутаты бола алады.
Орталық сайлау комиссиясының мәліметінше, Қазақстанда сайлауда дауыс беруге 12 032 550 азаматтың құқығы бар.
