Бұл туралы Қазақстан мұсылмандары діни басқармасы хабарлады.
Нұр-Сұлтан қаласындағы 15 жылдық тарихы бар "Нұр Астана" мешітінің атауын өзгерту туралы ұсынысты Ғұламалар кеңесі берген болатын. Бұл ұсыныс Қазақстан мұсылмандары діни басқармасының кезектен тыс төралқа мәжілісінде талқыланып, ҚМДБ бөлім басшылары, облыс имамдары мен Орталық аппарат қызметкерлері мешіт атауының өзгеруін қолдап, дауыс берді. Нәтижесінде мешіт ендігі таңда ойшыл, ғұлама Әбу Насыр әл-Фараби есімімен аталады.
Жиында бұдан бөлек тағы екі мәселе қаралды. Олар – қарашада елордада Тәуелсіздіктің 30 жылдығына орай өтетін халықаралық конференция және желтоқсан айына жоспарланған ҚМДБ-ның жылды қорытындылау төралқа мәжілісі.
"Егемендік алғанымызға 30 жыл толуына орай ұйымдастырғалы отырған ауқымды конференцияға Түркия, Өзбекстан мен Қырғызстан, Тәжікстан, Ресей мен Башқұртстан, сондай-ақ, Моңғолия мемлекеттерінің мүфтилері, отандық дін ғалымдары мен имамдар қатысады. Қазіргі кезде конференцияның арнайы жұмыс тобы құрылып, дайындығын пысықтауда", – деді Бас мүфти Наурызбай қажы Тағанұлы.
