Елордада 13 мың үлескер отбасының мәселесі шешілді

15 наурыз 2022, 16:49 Нұрболат Аманжол Авторға хат жазу قازاقشا Qaz

2019 жылдың жазында проблемалы 150 көппәтерлі тұрғын үй кешені болса, қазір оның 90-ны аяқталды.

Нұр-Сұлтан қаласының әкімі Алтай Көлгінов Instagram парақшасында елордалық 16 мың үлескердің 13 мыңының мәселесі шешілгенін мәлім етті.

"Елордада 16 мың үлескер отбасының 13 мыңының проблемасы шешілді. Құрылысы ұзаққа созылған өзге нысандар бойынша жүйелі жұмыс жүріп жатыр. Жергілікті орындарды аралау барысында мынадай проблемалы тұрғын үй кешендерінің үлескерлерімен кездестім: "Садовые кварталы", "Комсомольский" және "Аниса" ТК. Жалпы алғанда құрылысы ұзаққа созылған үш көппәтерлі тұрғын үй кешенінде шамамен 1,5 мың үлескер отбасы бар", – деп жазды қала әкімі Алтай Көлгінов.

Оқи отырыңыз: 2022 жылды астананың бірқатар тұрғыны жаңа пәтерде қарсы алады

Үлестік құрылыс нысандары:

"Садовые кварталы" тұрғын үй кешені – құрылысы 2013 жылы басталған. Бірақ 2014 жылы іргетасының қадалары тұрғызылған күйінде ғана қалды. Бүгінге дейін осы нысанның үлескерлерімен тек қазаншұңқырдың маңында кездескенбіз. Одан бері ауқымды жұмыс жүргізілді: техникалық тексеру өткізіліп, құрылысы жанданды, ал ең маңыздысы – инвесторлар жұмылдырылды. "Садовые кварталы" тұрғын үй кешенінің құрылысын аяқтау үшін бюджеттен қаражат бөлінген жоқ. Нысанның құрылысы жеке инвесторлар есебінен салынып жатыр.
"Комсомольский" тұрғын үй кешені 7 жыл бұрын проблемалы нысанға айналды. Мұнда пәтерлерді 600-ден аса үлескер отбасы алған. Қазіргі уақытта нысанда витраждарды монтаждау, терезелер орнату, лифт жабдықтарын монтаждау, инженерлік желілерді орнату және т.б. жұмыстар жүріп жатыр.
"Аниса" тұрғын үй кешені – сегіз жылдық тарихы бар нысан. Бұл нысанға да инвесторлар тарттық. Олар өз қаражаты есебінен нысанның құрылысын аяқтайды. Мәселен, 1 және 2-блоктарда қабырғаларын қалау жұмыстары, 5 және 6-блоктарда монолитті жұмыстар жүріп жатыр.

"2019 жылдың жазында проблемалы 150 көппәтерлі тұрғын үй кешені болса, қазір оның 90-ны аяқталды. Қалған нысандар бойынша қадамдық іс-шаралар жоспары бар", – деп жазды елорда әкімі.