Алматы облысы Төңкеріс ауылындағы төрт бірдей саяжай тұрғындары жергілікті кәсіпкердің әрекетіне наразы, деп хабарлады 31 арнаның Информбюро ақпараттық бағдарламасы.
Халықтың айтуынша, бұрын елді мекендерді мектеп пен ауруханаға жалғайтын төте жол жеке шаруа қожалығының иесі тарапынан жабылып қалған. Салдарынан екі мыңнан астам отбасы күнделікті қатынау мәселесіне тап болып отыр.
Тұрғындардың сөзінше, жол екі апта бұрын тастармен қоршалып, көлік қозғалысына толық шектеу қойылған. Осыдан кейін жедел жәрдем мен мектеп автобустары балама жолмен жүруге мәжбүр болып, жол қашықтығы шамамен 5 шақырымға ұзарған.
Саяжай тұрғындары бұл жағдайдың әсіресе қарттар мен медициналық бақылауды қажет ететін азаматтарға ауыр тиіп отырғанын айтады. Олар төте жолдың жабылуын заңсыз деп санап, оны қайта ашуды талап етіп отыр.
Ал кәсіпкер тараптың өкілдері бұл аумақтың заңды түрде жеке меншікке берілгенін және жерді игеру мақсатында бөгеттер қойылғанын мәлімдеді. Олардың айтуынша, бұрыннан "жолға айналып кеткен" учаске де шаруашылықтың аумағына кіреді, сондықтан көлік қозғалысына рұқсат берілмейді.
Дауға түскен аумақ екі аудан шекарасына тиесілі: саяжайлар Еңбекшіқазақ ауданында орналасса, жол өтетін жер Талғар ауданына қарайды. Екі аудан әкімдігі әзірге ортақ шешімге келе алмаған.
Тұрғындар мәселе шешілмесе, сотқа жүгінетіндерін айтып отыр.