"Достар" сериалында Чендлердің рөлімен танылған америкалық актер Мэттью Перри 54 жасында қайтыс болды, деп хабарлады TMZ.
Оның денесі Лос-Анджелестегі үйіндегі гидромассаж ваннадан табылды. Зорлықпен өлтіру белгілері жоқ.
Порталдың хабарлауынша, актер екі сағат бойы пиклбол ойнап (бадминтон, теннис және үстел теннисі) үйіне оралған да, көмекшісіне тапсырма берген. Актердің ассистенті екі сағаттай уақыт өткен соң оралғанда Мэттью Перридің ес-түссіз жатқанын көріп, жедел жәрдем шақырған.
Перри естеліктерінде ішімдік пен есірткіге тәуелді болғанын және олармен күресу туралы айтқан. 2018 жылы ол асқазан-ішек жолы ауруларына байланысты операция жасатып, ауруханада бес ай жатқан. Мэттью Перри "Достар" сериалынан басқа "Беверли-Хиллз, 90210", "Тоғыз ярд" және "Рон Кларктің бастан кешкені", "Сансет-Стриптегі 60-студия" секілді фильмдерде басты рөлді сомдаған.
