"Даму" қорынан несие алмақ болған алматылықтар алаяқтарға 300 млн теңгеден астам қаржы берген

"Даму" кәсіпкерлікті қолдау қорының атын жамылған алаяқтар 200-ге жуық адамға кемі 1,5 миллион теңгеден ақшалай және заттай несие рәсімдеткен. Алданған тұрғындар Медеу ауданы полиция басқармасына жиналып, қала көшелерінің бірін жапты, деп хабарлады 31 арнаның "Информбюро" ақпараттық бағдарламасы. 

"Олар: "20 млн теңге шығару үшін несие тарихыңды жақсарту керек. Алайда, тауарды бізге бересіз. Біз оны қайта өткізіп, сізге үлкен сомада қаражат алып береміз" деді. Дүкенге барып бір жарым миллион теңгеге әрқайсысы 600 мың тұратын екі телефон мен құлаққап алдық", – деді жәбірленуші Гүлназ Керімқұлова. 

Тұрғындар осы уақытқа дейін күдерін үзбей күтіп, қаражатты қайда жұмсайтынын жоспарлаған. 

"Өзім құрылысшымын, техника мен трактор алайын деп едім. Тағы біреулер мал алмақшы болды", – деді жәбірленуші Медет Тоқтарбаев. 

---

Оқи отырыңыз: Алаяқтар жарнамаға Тоқаевтың есімін пайдаланған. ІІМ мұндай 70 деректі анықтады

---

Тұрғындар екі күдіктінің ұсталғанына қарамастан, тергеудің дұрыс жүргізілмей жатқанын айтады. 

"Қазір екі азамат ұсталып, қамауда отыр. Екеуінің үстінен ҚР ҚК 190-бабының 3-тармағы бойынша яғни, "аса ірі көлемде алаяқтық дерегі" бойынша қылмыстық іс қозғалды", – деді Алматы қалалық полиция департаментінің ресми өкілі Салтанат Әзірбек. 

Бұл бапқа сәйкес, қылмыскер 7 жылға бас бостандығынан айырылуы мүмкін.