"Шексіз мүмкіндіктер әлемі: Жастардың дамуына жаңа қадам" облыстық жастар форумы Батыс Қазақстан облысының қоғамдық даму басқармасының қолдауымен "Болашақ" корпоративтік қорының ұйымдастыруымен өтті. Іс-шараның негізгі мақсаты – облыс жастары арасындағы қарым-қатынасты нығайтып, үздік әдістемелер, жобалармен алмасу, жастар саясаты, мәдениет, кәсіпкерлікті қолдау салаларында облыс жастарының тәжірибелерін зерттеу.
Форум жұмысы қоғамдағы аса өзекті мәселелерді және оларды шешу бойынша тиімді мысалдарды талқылауға, әлеуметтік жобалар, кәсіпкерлік, мәдениетаралық тәжірибе алмасу, өзара тиімді байланыстар орнатуға, жастар әріптестігін дамытуға бағытталған.
Форумға шақырылған спикерлер TEDx форматындағы пленарлық отырыста "Жастар саясаты", "Волонтерлық бағыт", "Ұлттық құндылық", "Бизнес бастау" және басқа да тақырыптарда баяндама жасады.
Журналист, тележүргізуші, ақпарат саласының үздігі Гүлназ Әлімгерей кездесуде сөз сөйлеп, көпшіліктің ілтипатына бөленді. Сондай-ақ самбодан әлем чемпионы Ерболат Байбатыров, ақын, хит әндердің авторы Дәурен Шамұратов, блогер Шарипа Базарбаева, кәсіби фотограф, "Үркер»" ұлттық сыйлығының жеңімпазы Мейірбек Тажкуранов спикер болып, өз тәжірибелерімен бөлісті.
