Бизнеске келген шығын 92,3 миллиард теңгеден асты

"Атамекен" ұлттық кәсіпкерлер палатасы елдегі тәртіпсіздіктер кезінде бизнестің қаншалықты зардап шеккенін атады.

9 қаңтар, сағат 09.00-дегі жағдай бойынша, сall-орталыққа 2320 қоңырау түскен. Оның ішінде:

• тонау мәселелері бойынша – 1127;
• форс-мажор бойынша – 26;
• блок-бекеттер бойынша – 2;
• жеке тұлғалардан – 1052 қоңырау түскен.

"Еліміздің 10 өңіріндегі 1351 нысанда орналасқан 1181 бизнес зардап шекті. Оның ішінде Алматыда 935 бизнес зарар көрді. Олар 1091 нысанда орналасқан",– деп жазылған хабарламада.

Кәсіпкерлер палатасының ақпараты бойынша, келтірілген зарардың жалпы сомасы, жуықтап есептеулер бойынша, 92,3 миллиард теңгеден асты. Оның ішінде 90,7 миллиард теңге – Алматы кәсіпкерлеріне келген шығын. 

Жалпы, сауда саласында – 1122, қоғамдық тамақтандыру саласында – 17, қаржы секторында – 31, логистика саласында – 8 нысан зардап шеккен.