Беташар салты Адамзаттың материалдық емес мәдени мұрасының репрезентативтік тізіміне енді

Қазақтың салттарының бірі – Беташар Адамзаттың материалдық емес мәдени мұрасының репрезентативтік тізіміне енді, деп хабарлады ҚР мемлекеттік кеңесшісі Ерлан Қарин. 

"Парагвай астанасы Асунсьонда ЮНЕСКО-ның Материалдық емес мәдени мұраны қорғау комитетінің отырысында қазақтың ежелгі салттарының бірі Беташар Адамзаттың материалдық емес мәдени мұрасының репрезентативтік тізіміне енгізілді", – деп жазды ол. 

Информбюро бұған дейін қазақтың беташар және салбурын салт-дәстүрлерін ЮНЕСКО материалдық емес мәдени мұралар тізіміне енгізу бойынша жұмыс жүріп жатқанын хабарлаған болатын. 

Беташар – жаңа түскен келіннің бетін ашып, көпшілікке таныстыру үшін жасалатын салт. Беташарға дейін шымылдық ішінде ақ орамал тағып отырған келіннің бетін жақын қыз-келіншектерден өзге ешкім көрмейді. Беташардың мәні – әрі келіннің бетін ашып елге таныстыру, әрі келінге келген жерін таныстыру.

Оқи отырыңыз: 

• Беташар мен салбурын ЮНЕСКО материалдық емес мәдени мұралар тізіміне енуі мүмкін
• "Жаңа түскен келінге көрімдігін беріңіз". Беташардың мәні неде
• Беташардың мәні неге бұзылды? Тойды тәртіпке келтіруге бес кеңес