Продюсер Баян Алагөзова бүгін кездескен актриса, Қазақстанның халық әртісі, Қыз Жібек рөлін сомдаған Меруерт Өтекешоваға пәтер сыйлайтынын мәлімдеді.
"Сіздей адам дүниеде жоқ және болмайды да. Мен сізге өзіңізге ұнайтын, өзіңіз қалаған ауданда пәтер сыйлағым келеді. Екі айдың ішінде сізге пәтер таңдап береміз деп уәде беремін. Сіз ең жақсы жағдайда өмір сүруіңіз керек", – деді Баян Алагөзова.
Сондай-ақ, Баян Алагөзова Меруерт Өтекешоваға тон мен сырға сыйлады. Бұдан бөлек, продюсер актрисаға қоғамда қызу талқылау тудырған Қыз Жібек кейіпкерінің аңызға айналған камзолын табыстады.
Бұған дейін Баян Алагөзова фильм түсірілімінде Меруерт Өтекешова киген камзолдың өзінің жеке коллекциясында екенін және оны сыйлық ретінде алғанын айтқан болатын. Қазақстандықтардың пікірлері екіге бөлінді: біреулер бұл бұйым халықтың мұрасы болып, музейде сақталуы тиіс десе, енді біреулер камзол сенімді қолда екенін атап өтті. Мәдениет және ақпарат министрлігі бұл құнды дүниенің жеке меншікке қалай өткенін анықтауға уәде берді.
Қызғылт түсті, терімен көмкерілген камзолдың авторы – суретші Гүлфайрус Ысмайылова. "Қыз Жібек" фильмін режиссёр Сұлтан-Ахмет Қожықов 1969-1970 жылдары "Қазақфильм" киностудиясында түсірген.
