Атырау облысының аумағында қос азаматтықпен жүрген бес адам анықталды, деп хабарлады Polisia.kz сайты.
"Атырау облысының ПД Көші-қон қызметі басқармасы ағымдағы жылдың басынан бері Қазақстан Республикасы азаматтығының жеке басын куәландыратын құжаты бар және басқа мемлекеттің азаматтығын қабылдаған бес азаматты анықтады", – деді Атырау облысы полиция департаментінің басшысы Нұрхат Оразбаев.
Олардың барлығы Қазақстан Республикасымен қатар Ресей Федерациясының азаматтығын алған азаматтар. Осыған байланысты оларға қатысты Қазақстан Республикасы ӘҚБтК-нің 496-бабының 2-бөлімімен (Қазақстан Республикасының азаматтық туралы заңнамасын бұзу) әкімшілік хаттамалар толтырылып, процесуалдық шешім қабылдау үшін сотқа жолданып, 200 айлық есептік көрсеткіш мөлшерінде әкімшілік айыппұл салынды.
Еске салсақ, Қазақстан Республикасында қос азаматтыққа жол берілмейді, яғни шетел азаматы бір мезгілде Қазақстан Республикасының азаматы бола алмайды.
Оқи отырыңыз: Өскемен тұрғыны 10 жыл бойы екі елден зейнетақы алып келген
Егер Қазақстан Республикасының азаматы басқа мемлекеттің азаматтығын алатын болса, онда сол кезден бастап Қазақстан Республикасының азаматтығы сақталмайды.
