Мемлекет басшысының тапсырмасы аясында ұйымдастырылған Өңірлік кадр резервінің "Құрылымдық сұхбат" кезеңі аяқталды. Аталған резервтің мақсаты – өңірлерді дамытуға талантты жастарды тарта отырып, өңірде жаңашыл ойлайтын көшбасшылар мен жас басқарушылардың тобын қалыптастыру болып табылады.
ҚР Мемлекеттік қызмет істері агенттігінің Атырау облысы бойынша департаменті және Атырау облысы әкімдігімен бірлесіп өткізілген іс-шараға облыс әкімі, комиссия төрағасы Серік Шәпкенов қатысып, барлық қатысушыларға сәттілік тіледі.
Сұхбатқа қатысқан үміткерлер өзі таңдаған салалық бағыттар, атап айтқанда экономика және қаржы, индустрия және өнеркәсіп, агроөнеркәсіптік кешен және жер қатынастары, цифрландыру, тұрғын үй-коммуналдық шаруашылық және инфрақұрылым, әлеуметтік салалар бағыттары бойынша жоба қорғап, комиссия мүшелерінің сұрақтарына жауап берді.
Айта кету қажет, биылғы 1 наурыздан бастау алған іріктеуге Атырау облысынан 497 адам өтініш білдіріп, бұдан әрі іріктеу кезеңдеріне жіберілген болатын. Өз кезегінде, Ассессорлармен болған "Құзыреттерді бағалау" кезеңінде 38 үміткер оң нәтиже көрсетіп, сұхбат кезеңіне жолдама алған.
Аталған іріктеу сатысы ҚР Президенті жанындағы Мемлекеттік басқару академиясының базасында өткізілді.
Сондай-ақ, іріктеудің ашықтығы мен объективтілігін қамтамасыз ету мақсатында кандидаттармен сұхбаттасу кезеңінде қоғамдық ұйымдардың өкілдері, әр түрлі салалар бойынша сарапшылар қатысты.
