Астанада жөндеу кезінде лифт опырылып түсті: бір адам қаза болды

Астанада тұрғын үй кешенінде лифт құлап, бір қызметкер қаза тапты, тағы екеуі жарақат алды, деп хабарлады қалалық денсаулық сақтау басқармасы.

Оқиға Төлебаев көшесіндегі тұрғын үйде болған. Алдын ала мәлімет бойынша, жөндеу жұмыстары кезінде лифт кабинасы құлаған.

"Бір лифт компаниясының қызметкері оқиға орнында қаза тапты. Екі адам №1 көпсалалы қалалық ауруханаға жеткізілді. Біреуінің жағдайы ауыр, екіншісі орташа ауыр деңгейде. Екеуіне де барлық қажет медициналық көмек көрсетіліп жатыр", – деді дәрігерлер.

Полиция бұл факті бойынша қылмыстық кодекстің 156-бабының 3-бөлігі ("Еңбекті қорғау қағидаларын бұзу, адам өліміне әкеп соғу") бойынша қылмыстық іс қозғағанын мәлімдеді.