Әскери мүлікті бүлдіргендер 8 жылға дейін бас бостандығынан айырылады

Әділет министрлігі Ашық НҚА порталында ҚР кейбір заңнамалық актілеріне Қылмыстық, Қылмыстық-процестік және Қылмыстық-атқару кодекстерін оңтайландыру мәселелері бойынша өзгерістер мен толықтырулар енгізу туралы заң жобасын жариялады. 

Заң жобасында Қылмыстық кодекстің бірнеше бабына өзгеріс енгізу көзделген. Соның бірі – "Әскери мүлiктi абайсызда жою немесе бүлдiру" атты 460-бап.

Жобада қару-жарақты, қозғалыс құралдарын не әскери техниканы ауыр зардаптарға әкеп соққан абайсызда жою немесе бүлдiру 4 000 АЕК дейінгі мөлшерде айыппұл салуға не сол мөлшерде түзеу жұмыстарына не төрт жылға дейінгі мерзімге бас бостандығын шектеуге не сол мерзімге бас бостандығынан айыру жазасына әкеп соқтыратыны жазылған.

Қазіргі редакцияда бұл бап үшін 200 АЕК дейiнгi мөлшерде айыппұл салу не сол мөлшерде түзеу жұмыстарына не 50 тәулiкке дейiнгi мерзiмге қамаққа алу жазасы қолданылады.

---

Оқи отырыңыз: 2023 жылы әскери қызметшілер жалақысы 60%-ға дейін өседі

---

Сондай-ақ, Қылмыстық кодекстің 459-бабына өзгеріс енгізу жоспарланған. Әскери мүлікті қасақана жою немесе бүлдіру 4 мың АЕК дейінгі мөлшерде айыппұл салуға не сол мөлшерде түзеу жұмыстарына не екі жылға дейінгі мерзімге бас бостандығын шектеуге не төрт жылға дейінгі мерзімге бас бостандығынан айыруға жазаланады. Қолданыстағы редакцияда айыппұл сомасы – 2 мың АЕК, ал бас бостандығынан айыру жазасы – екі жыл.

Бұл әрекет ауыр зардаптарға әкеп соқтырса, зорлық-зомбылық қолданып не қолданамын деп қорқытып, алдын ала сөз байласу арқылы жасалса 3 жылдан 8 жылға дейін бас бостандығынан айыру жазасы қолданылады. Қазіргі редакцияда бес жылға дейiнгi мерзiмге бас бостандығынан айыруға жазаланады.