Sana foundation қоғамдық қорының ұйымдастыруымен кезекті Қоғамдық лекция өтті. Рухани-кәсіби дамығысы келетіндерге арналған "Көк мұхит стратегиясы" тақырыбындағы лекцияда өз саласында көк мұхит стратегиясының үлгісін жасай алған кәсіпкерлер дәріс өтті. Жалпы саны 220 адамды қамтыған шара көпшіліктің көңілінен шықты.
Sana foundation қоғамдық қоры бірнеше бағытта жұмыс жасайды. Кездесуде "Көк мұхит стратегиясы" кітабының тұсауы кесілді. Бұл кітап Harvard Business Review баспа үйінің әлемде 4 миллион данамен тараған бестселлері. Осыған дейін 47 тілде жарық көрген.
Спикерлер кәсіп бастағысы келетіндер үшін өз салалары туралы сөз қозғады.
"Easy Tap" IT компаниясының негізін қалаушысы, "Forbes 30 under 30" қатысушысы – Мағзұм Төлеш "Стартапқа өз көгілдір мұхитын қалай табуға болады?" тақырыбы аясында сөйледі. Оның айтуынша, стартап – үлкен тәуекел.
Мағзұм Төлеш бизнесін Өзбекстан мен Қырғызстан нарығына шығарған. Енді оның кәсібі Әзербайжанның нарығына да шығуы мүмкін. Ол кітаптың өміріне әсері туралы:
"Мен "Көк мұхит стратегиясы" кітабын 2018 жылы оқыдым. Кітапты оқығаннан кейін сол жылдың сәуір айынан бастап ойларым өзгере бастады. Оны желідегі жазбаларымнан байқасаңыздар да болады", – деп айтты.
Ол EasyTap IT компаниясына 500 мың доллардан астам инвестиция тартқан, қазір компанияның 1.5 жыл ішінде құны 10 млн доллардан асқан.
Оқырмандарға қазақша "Сала таңдау" Youtube арнасы арқылы танылған кәсіпкер Ұлан Құрманғалиев те сөз сөйледі. Ол кәсіпкерлердің негізгі жіберіп алатын қателіктері туралы айтып, кәсіпті қалай тез бастау керектігін және қандай табысты салалары барын баяндады.
"Кез келген кәсіпті бірден үлкен қаржымен бастауға болмайды. Кәсібіңізге қажет жер мен құрылғыларды бастапқыда жалға алыңыз. Сол кезде шынында сол салада жұмыс істей аласыз ба, тек қызығушылықпен нарыққа кіргіңіз келді ме бәрі түсінікті болады. Егер, ол кәсіпті игере алмайтыныңызды түсінсеңіз, тек жалға алу ақысы ғана шығын болады", – деп кеңес берді ол.
Ұлан кәсіп бастау тақырыбында контент жасағандықтан жиі тәуекелге толы шешім қабылдайды. Жиырма миллион тіпті одан да көп қаржы жоғалтқан шешімдері туралы айтып, жас кәсіпкерлерге ой салды.
Urbo Coffee кофехана желісінің негізін қалаушысы Дәурен Мұратханұлы Алматы нарығын қалай жаулағаны туралы айтып берді. Қазір оның кофеханалары Алматыда ең көп филиалға ие, ал еліміз бойынша 40 шақтысы бар. Ол бизнесте масштабқа шығудың жолдарын айтып берді.
"Мен кәсіп бастағанға дейін мемлекеттік қызметкер болып жұмыс істедім. Кәсіп бастауға идея мен қалау бар, қаржы жоқ болып жүрдім. Бастапқыда франшиза алып, тек филиал ретінде кәсібімді бастадым. Қазір 7 жыл бұрын ашқан Smart Point-тағы алғашқы бизнесім әлі күнге дейін жұмыс істеп тұр. Алматыда 30 ға жуық кофехана аша алдым", – деді ол.
Avataria балалар парктер желісінің негізін қалаушы, vkorzinka.kz азық түлік дүкендер желісінің иесі, YPO мүшесі Алмаз Тультаев 28 жылдан аса тәжірибесі бар кәсіпкер. Өз мысалында "Көк мұхит стратегиясынан" шабыт алған кәсіпкер аталмыш кітаптың қазақ тіліне аударылуына демеушілік еткен. Кітап қазір Kitapal дүкендер желісінің сөрелеріне қойылып, сатылымға шыққан.
Сондай-ақ, кештің соңын – MBA лекторы, Ұлыбританияда білім алған "Болашақ" бағдарламасының стипендиаты, бизнес консультант әрі PHD кандидат Жасұлан Кушебаев аяқтады. Ол компанияларға шолу жасап, кәсіпкерлерге Көк мұхитқа шығуға керек теориялық формулалармен бөлісті.
Григорий Петровтың "Финляндия – ақ лала гүлдер мекені" кітабында Снелман есімді кейіпкердің лекциялары елді қалай өзгерткені сөз болады. Снелман секілді тұлғалардың лекциясынан соң, Финляндия батпақтың үстінде тұрған елден әлемдегі ең бақытты адамдар өмір сүретін елге айналған. Спикерлер Снелман секілді өз тәжірибелерімен бөлісіп, шараға келген азаматтардың сауалдарына жауап берді.
Қоғамдық лекцияның мақсаты – қоғамды қалыптастырушы платформа болу арқылы еліміздегі өмір сапасын арттыруға, экономиканы жақсартуға үлес қосу. Он жыл бұрын басталып, араға біраз жылдар салып қайта жалғасын тауып жатқан қоғамдық лекция кәсіпкерлік пен ағартушылықты трендке айналдыруды көздейді.
