Алматыда құтқарушылар Титов шыңында жарақат алған жасөспірімді эвакуациялады

Алматы қаласы ТЖД құтқарушылары Титов шыңында жарақат алған жасөспірімді құтқару операциясын жүргізді, деп хабарлайды ТЖМ баспасөз қызметі.

Кеше "Тұйық су" бақылау-құтқару пунктінен құтқарушылар Медеу ауданындағы Титов шыңына аттанған. 

"Үш бала мен бір ересек тауға көтерілген. Таудан түсу кезінде 2009 жылы туған жасөспірімге тас құлап, білегінің ашық сынуы тіркелген. Құтқарушылар зардап шегушіге алғашқы медициналық көмек көрсетіп, іздестіру-құтқару бекетіне жеткізді. Ол ТЖМ Апаттар медицинасы орталығының дәрігерлеріне тапсырылды. Жағдайы тұрақты, есі орынды, өздігінен жүре алады", – делінген ақпаратта.

ТЖМ тасты жерлерде сақ болу, бөртпелерден аулақ жүру және тастардың құлау қаупі бар жерлерде басқа адамдардың астында көтерілмеу қажеттігін ескертеді.