Алматыда құрылыс нормаларын сақтамаған компания жазаланды

Алматы қаласының Қала құрылысы бақылау басқармасы AsiaMax ЖШС-не берілген құрылыс-монтаж жұмыстарына арналған лицензияның қайтарылғанын хабарлады.

Аталған мердігер ұйым Әбіш Кекілбайұлы көшесіндегі сыртқы кәріз желісін қайта жаңарту жұмыстарын жүргізген. Алайда жоба мерзімінің созылуы және тұрғындарға қолайсыздық тудырғаны үшін бірқатар ескерту алған.

Басқарманың жоспардан тыс тексерісі барысында жобалық шешімдерден айтарлықтай ауытқулар мен құрылыс саласындағы мемлекеттік нормативтердің бұзылғаны анықталды.

Нәтижесінде компанияға әкімшілік шаралар қолданылып, заңбұзушылықтарды жою жөнінде нұсқама берілді. Сонымен қатар, мердігер құрылыс-монтаж жұмыстарын жүргізу құқығынан айырылды.