Алматыда көлік иелеріне жаңа шарттар қойылуы мүмкін

Алматы қаласының билігі көшелердегі көнерген көліктер санын азайту үшін арнайы компания құруды жоспарлап отыр. Жоба аясында ескі автокөліктерді сатып алып, қаладағы экологиялық ахуалды жақсарту көзделген, деп хабарлады 31 арнаның Информбюро ақпараттық бағдарламасы.

Әкімдік мәліметінше, тұрғындарды жаңа көлік алуға ынталандыру үшін жеңілдетілген несие, лизинг және Trade-in бағдарламалары енгізілуі мүмкін. Сонымен қатар, жобаға Astana Motors, Orbis секілді отандық автокөлік өндірушілерін тарту жоспарланып отыр.

Алайда бұл бастамаға жүргізушілер күмәнмен қарап отыр. Көпшілігі ескі көліктеріне лайықты баға ұсынылатынына сенбейді. Сондай-ақ, несие мен лизингке қатысты ұсыныстар да халық арасында қолдау таппай отыр.

Экологтар да жобаны сынға алды. "Тәжірибешіл экологтар қауымдастығының" төрайымы Лаура Маликова қазіргі таңда елде нақты экологиялық нормативтер бекітілмегенін айтып, мәслихат қабылдаған талаптардың заңдылығына күмән келтірді.

Мамандардың пікірінше, көліктерді жаппай жаңартудан гөрі, қаланы толық газға көшіру және автокөліктердің техникалық жағдайын, әсіресе катализаторларын бақылау тиімдірек болуы мүмкін.

Айта кетейік, мәслихат бекіткен ережеге сәйкес, Алматы көшелерінде жүретін көліктердің экологиялық стандарты Euro-5 emissions standard деңгейінен төмен болмауға тиіс.