Биыл Алматы қаласында аса қажет мамандар жетіспеушілігі мәселесін шешу үшін резидентураға 120 грант бөлінді. Бұл туралы Алматы қоғамдық денсаулық басқарма басшысының орынбасары Светлана Сұлтанғазиева мәлімдеді.
Қазір Алматы қаласындағы инфекциялық стационарларда 6 315 медицина қызметкері жұмыс істейді. Бұған дейінгі медицина қызметкерлерінің жетіспеушілігіне байланысты арнайы инфекциялық стационарда жұмыс істейтін мамандар резерві жасақталды.
"Мамандар қоры күні кеше интернатура мен резидентура және колледжді тәмамдаған түлектерден құралады. Сондай-ақ, қазір емханада жұмыс істеп жатқан қызметкерлер бар. Жалпы қорда 2 мыңға жуық маман кіреді. Расымен де, коронавирус инфекциясы тарала бастаған кезде инфекционистер мен реаниматологтар өте көп жетіспеді. Осы жетіспеушілік әлі күнге дейін сезіліп отыр. Осы орайда Алматыдағы кадрлық жетіспеушілік мәселесін шешу үшін үлкен жоба жасалды – университеттер базасында резидентурада оқу үшін 120 грант бөлінбек. Оған ақша жергілікті бюджеттен алынды. 120 гранттың көбісі анестезиолог пен инфекциялық аурулар мамандықтарына беріледі", – деді ведомство өкілі.
Еске салсақ, пульмонолог маман Covid-19 клиникасына депрессия сынды жүйке жүйесінің белгілері қосылғанын хабарлады. Сондай-ақ, кей науқастың қанында тромбоцит көлемінің бірден ұлғаюы байқалады.
