Алматыда 9 мамыр күні бірқатар көше уақытша жабылады

8 мамыр 2025, 15:03 Жазира Пірімқұл Авторға хат жазу قازاقشا Qaz

Ертең 28 гвардияшы-панфиловшылар саябағында гүл шоқтары қойылады.

Алматыда 9 мамыр күні бірқатар көше уақытша жабылады, деп хабарлайды қалалық мобильділік басқармасы.

Басқарманың мәліметінше, салтанатты рәсімге байланысты саябақ аумағында көлік қозғалысы уақытша шектеледі.

Сағат 07:00–ден 12:00–ге дейін Қонаев — Жібек жолы — Қазыбек би — Бәрібаев көшелері аумағында көлік қозғалысы тоқтатылады. Бұл аумақта автотұрақ та уақытша жабылады. Сонымен қатар осы уақыт аралығында Гоголь көшесі Орталық мәдениет және демалыс саябағынан Қонаев көшесіне дейін толықтай жабылады.

Оқи отырыңыз: Алматы аудандарында 7-9 мамырда қандай мерекелік шаралар болады

Одан бөлек іс-шараға қатысушыларға ыңғайлы болу үшін 28 гвардияшы-панфиловшылар саябағынан келесі бағыттар бойынша біржақты тегін тасымалдау ұйымдастырылады:

Достық даңғылы (Төле би және Қазыбек би көшелерінің арасы) — Абай алаңы — Орталық стадион;
Қалдаяқов көшесі (Гоголь көшесінің оңтүстігінде) — Халық Арена;
Гоголь көшесі (Қонаев көшесінің бұрышы) — Райымбек батыр даңғылы / Абылай хан көшесі;
Қонаев көшесі (Гоголь мен Қазыбек би көшелерінің арасы) — "Сәлем" базары;
Гоголь көшесі (Қалдаяқов көшесінен батысқа қарай) — Алматы Арена.

Серіктестер жаңалықтары