Іле-Алатау ұлттық саябағының 10 тау бағыттарында туристердің қауіпсіздігін және хабардар болуын қамтамасыз етуге, сондай-ақ тауларда табиғатты сақтауға арналған қазақ, орыс және ағылшын тілдерінде жаңа ақпараттық тақтайшалар пайда болды. Бұл туралы Алматы қаласының әкімдігі хабарлады.
"Біз тау инфрақұрылымын дамытуға ерекше назар аудара отырып, туристік тәжірибені жақсарту бойынша жұмыс істеп жатырмыз. Орнатылған тақтайшалар туристерді бір мезгілде хабардар етеді және экологиялық жауапкершілікке шақырады. "Табиғатты қорғаңыз және үйге жағымды әсермен оралыңыз!", "Make earth green to keep it clean!", "Өзіңізден кейін, тазалықты сақтағаныңыз үшін рахмет!", "Our climate is changing; why aren’t we?" сөздері тау әуесқойлары үшін табиғи байлыққа ұқыпты қарау туралы еске салып тұрады", – деді Almaty Tourism Bureau басшысы Камила Лұқпанова.
Оқи отырыңыз: Алматыда жаңа кемпинг аймағы ашылды.
Ақпараттық тақтайшалар шағылыстырғыш жабынмен қапталған металл тақтайшалардан тұрады. Олар вандализмге төзімді сенімді қондырғылармен жабдықталған және бірнеше бағытқа орнатылған:
- Бутаковка шатқалы;
- Кімасар шатқалы;
- "Горельник" кемпинг аймағы:
- Кіші Алматы шатқалы (Медеу);
- Кіші Алматы шатқалы (Ақбұлақ);
- "Қайың тоғайы" кемпинг аймағы;
- Үлкен Алматы шатқалы (ГЭС-2);
- Проходное шатқалы;
- Казачка шатқалы;
- "Казачка" кемпинг-аймағы.
Бұл орындарда бағыттың ұзақтығы және өту уақыты туралы көрсеткіштер орнатылған. Almaty Tourism Bureau таулы жорықтар кезінде қауіпсіздік ережелерін сақтау керектігін еске салады, сондай-ақ демалушылардан табиғатқа ұқыпты қарауды, тауда қоқыс қалдырмауды сұрайды.
