Алматы облысында 37 балаға арналған мектепте 137 бала оқиды

Алматы облысындағы Еңбекшіқазақ ауданы Еңбек ауылында 37 балаға арналған бастауыш мектепте 137 бала оқиды. Мұғалімдер бөлмесі де балалардың көптігінен сыныпқа айналған. Ұстаздар жиналысты сыртқа шығып өткізеді. Бұл туралы Almaty.tv тілшісі хабарлады.

Ата-аналардың айтуынша, сыныптың жетіспеуінен қыз бен ұл бір жерде шешініп, киінеді.

"Дене шынықтыру сабағы өткізілмейді. Оған арнайы спортзал жоқ. Асхана жайлы мүлде айтудың қажеті жоқ", – деді Еңбек ауылының тұрғыны Гүлдана Қуатбекова.

"Құжаттар дайын. Біз өз тарапымыздан іс-шараны атқардық, мемлекеттік акт жасадық", – деді Балтабай ауылдық округі әкімінің міндетін атқарушы Cәуле Әліпова.

Ауылдағы тұрғындар баласын шамасы келсе, көрші Еңбек ауылына оқытады. Алайда, мұнда да мектеп жабдықтары ескі, өрт сөндіру құралдарының мерзімі өткен.

"Бұл мәселені баяғыдан қозғап келеміз. Бала саны көп. Ең соңғы сабақ сағат 19:10-да аяқталады. Сол кезде балалардың үйіне қатынауы өте қиын. Мұғалімдер тарапынан екіге бөлінетін сабақтарға еңбек, орыс тіліне кабинет жетіспейді", – деді "Еңбек орта мектебі" КММ директорының орынбасары Бану Жанаева.

Еңбекшіқазақ ауданының білім бөлімі берген мәлімет бойынша, ауданда 16 мектеп салу жоспарда бар. Қазіргі таңда бесеуінің құжаты аяқталып, құрылысы басталады. Алайда бұл тізімге Өрнек пен Еңбек аулының мектептері енбеген.

"Өрнек ауылына мектеп салу үшін 180 орындық жер телімін сұраған болатынбыз. Жер телімі дайын болған соң, облыстық білім басқармасына мектеп салуға сұраныс берілді. Ал Еңбек ауылына қатысты айтатын болсақ,  Ақтоғандағы бейімделген мектеп қой. Ол ауылға тағы да 320 орынға жапсаржай құрылысын салуға тапсырыс берілді", – деді Еңбекшіқазақ ауданы білім бөлімінің басшысы Жарқын Нұрқалымов.