Биылғы додаға әлемнің 44 елінен 10 мыңнан астам адам қатысады.
2026 жылғы 19 сәуір күні Алматыда тоғызыншы рет Almaty Half Marathon жартылай марафоны өтеді. Іс-шараны "Бірінші болу – батылдық" корпоративтік қоры қала әкімдігінің қолдауымен ұйымдастырып отыр.
Ұйымдастырушылардың хабарлауынша, жарыс күні қалада жол қозғалысына уақытша шектеулер енгізіледі. Атап айтқанда, 19 сәуірде сағат 00:00-ден 12:00-ге дейін жарыс бағыты өтетін көшелердің бірқатар бөліктері ішінара жабылады.
Жартылай марафон таңғы 07:00-де Тұңғыш Президент саябағы маңында басталады. Осыған байланысты:
- Әл-Фараби даңғылының солтүстік бөлігі Розыбакиев көшесінен Мұстафин көшесіне дейін 00:00–12:00 аралығында жабылады (оңтүстік бөлігі ашық);
- Әл-Фараби даңғылының солтүстік бөлігі Розыбакиевтен Назарбаев даңғылына дейін 06:45–09:45 аралығында жабылады;
- Сейфуллин даңғылы (әл-Фарабиден Абайға дейін) 07:10–09:05 аралығында толық жабылады;
- Абай даңғылының оңтүстік бөлігі Саин көшесінен Байтұрсынов көшесіне дейін 08:50–11:15 аралығында жабылады;
- Абай даңғылының оңтүстік бөлігі Сейфуллиннен Байтұрсыновқа дейін 07:20–09:15 аралығында жабылады;
- Саин көшесінің шығыс бөлігі әл-Фарабиден Абайға дейін 08:30–10:20 аралығында жабылады (батыс бөлігі ашық).
Бұл шектеулер жарысқа қатысушылардың қауіпсіздігі мен қозғалысын тиімді ұйымдастыру мақсатында енгізіледі.
Айта кетейік, биылғы додаға әлемнің 44 елінен 10 мыңнан астам адам қатысады.