Абай облысының жоғары оқу орындарына қосымша 500 грант бөлінеді

Абай облысындағы мектептерде 9 мыңға жуық балаға орын жетіспейді. Алдағы уақытта 11 мектеп және 14 балабақша салу жоспарланған. Бірақ, мұның өзі жеткіліксіз. Үкімет пен әкімдікке облыс мектептеріндегі орын тапшылығы мәселесін біржола шешуді тапсырамын, деп мәлімдеді Қасым-Жомарт Тоқаев. 

"Біз ұстазды құрмет тұтқан елміз. Бұл сөзіміз нақты іспен бекітіліп жатыр. Арнайы Оқу-ағарту министрлігі құрылды. Біз бұған дейін "Педагогтардың мәртебесі туралы" Заң қабылдап, оның аясында мұғалімдердің жалақысын өсірдік. "Әліппені" қайтардық", – деді президент. 

Мұнымен қатар, мемлекет басшысы орта білімді дамытуға бағытталған бірқатар жағымды өзгерістер бар екенін алға тартты.

"Осындай игі шаралар арқылы біз қоғамда мұғалімнің мәртебесін одан әрі биіктетеміз. Ұстаз біздің қоғамда әрдайым сыйлы тұлға болады. Облыста қазіргі заманға қажетті, жоғары деңгейдегі, білікті мамандар даярлау үшін нақты шаралар қабылдануы керек. Осы орайда, Семейде университеттердің жанынан IT саласы мен тілдерді тереңдетіп оқытатын мектептер ашылуы қажет", – деді мемлекет басшысы. 

Сондай-ақ, аймаққа қажетті кадрларды дайындау үшін тиісті стандарт әзірлеген жөн екенін атап өтті. 

"Жастарымыз сапалы білім алып, туған өлкесін дамытуға үлес қосуға тиіс. Сол себепті, облыстағы жоғары оқу орындарына қосымша 500 грант бөлуді тапсырамын", – деді Қасым-Жомарт Тоқаев.