Астана әкімдігінің баспасөз қызметі елордада Абай күніне орай өтетін іс-шараларды жариялады.
Сағат 10.00-де Журналистер аллеясында "Алдымда ақын Абай – Темірқазық!" әдеби кездесу өтеді. Бір сағаттан кейін Ұлттық академиялық кітапханада "Абай әлемі" іс-шарасы ұйымдастырылады. Осы уақытта №5 кітапханада оқырмандар "Абай – жүрек қалауы, даналық белгісі" іс-шарасында бас қосады.
Сондай-ақ, бұл күні Абай оқуларын орталықтандырылған кітапханалар жүйесі өткізеді. Сағат 17.00-де "Жастар" театры Абай шығармашылығына арналған әдеби-музыкалық кешке шақырады.
Оқи отырыңыз: #AbayChallenge: Димаш Абай Құнанбаевтың туған күніне орай челлендж жариялады
Ал Ақкөл қаласындағы "Арман Боровичок" балалар сауықтыру орталығында "Абай – дана, Абай дара қазақта" поэтикалық кеші өтеді.
Сонымен қатар, әлеуметтік желілерде елордада тұратын барлық этнос өкілдерінің қатысуымен білім беру мекемелері арасында #МенАбайдыоқимын челленджі өтеді.
Тұран және Қабанбай батыр даңғылдарының қиылысындағы алаңда Абайдың 178 жылдығына орай ақынның шығармаларына жазылған күйлер орындалады. Қорғалжын алаңында "Адамзаттың алыбы – хакім Абай!" музыкалық-әдеби кеш өтеді.
Кешкі сағат 18.00-де М.Өтемісов атындағы Оқушылар сарайының ғимаратында "Абайдың соңғы күндері" кино көрсету іс-шарасы ұйымдастырылады.
