"76 млн теңге". Халықаралық олимпиада жүлдегерлері ақшалай сыйақы алды

Халықаралық пәндік олимпиадаларда жүлделі орындарға ие болған 27 қазақстандық оқушы қомақты ақшалай сыйлық алып, грант иегері атанды. Сыйақының жалпы сомасы 76 млн теңгеден асты, деп хабарлады Оқу-ағарту министрлігінің баспасөз қызметі.

Алтын медаль алған оқушыларға – 4 770 000 теңге, күміс медаль иегерлеріне – 3 180 000 теңге, қола медаль үшін 1 590 000 АЕК көлемінде ақшалай сыйлық берілді. Оқушыларды жарысқа дайындаған ұстаздар да бір реттік сыйақы алды.

Сонымен қатар халықаралық олимпиада жеңімпаздары қазақстандық жоғары оқу орындарына түсу үшін автоматты түрде грант алады.

Оқи отырыңыз: Аймағамбетов: Халықаралық олимпиада жеңімпазы 4 млн теңге сыйақы алады

Айта кетейік, биыл оқушылар халықаралық пәндік олимпиадаларға қатысу тарихында рекордтық медаль жеңіп алды. Ұлттық құрама қоржынында 3 алтын, 15 күміс және 9 қола медаль бар.

"Президент Қасым-Жомарт Кемелұлы Тоқаевтың қолдауының арқасында дарынды балаларға қолдау көрсетуді жалғастыра береміз. Қазір жеті  олимпиададан тұратын халықаралық беделді олимпиадалар тізімі келесі жылы тағы жеті олимпиадамен толықтырылады", – деді Оқу-ағарту министрі Асхат Аймағамбетов балаларды марапаттау салтанатында.