Индустрия және инфрақұрылымдық даму министрінің орынбасары Еркебұлан Дауылбаев тілшілердің "7-20-25" бағдарламасы туралы сауалға жауап берді.
"7-20-25 бағдарламасы жабылмайды. Мемлекет басшысының тапсырмасына сәйкес, аталған бағдарламаны жалғастыру жөнінде нұсқау бар", – деді вице-министр.
Айта кетейік, бұған дейін бағдарлама қаражат толықтай игерілуіне байланысты 2022 жылдың соңына дейін ғана қолжетімді болатыны туралы ақпарат шыққан. Себебі бағдарламаны іске асыруға 1 трлн теңге қаражат бөлінген еді.
Оқи отырыңыз:
- Ибрагимова жастар ипотекасының сомасын арттыру туралы: Жергілікті мәслихат шешеді
- Мұғалімдер неге Отбасы банкінің "Шаңырақ" бағдарламасымен ипотека ала алмайды?
Сонымен қатар, вице-министр екінші деңгейлі банктер беретін ипотеканы субисдиялау бағдарламасы туралы да айтты. Оның шарты бойынша, Қазақстан азаматы банктен 19,5 пайызбен ипотека алса, 7 пайызын мемлекет төлейді де, қалған 12,5 пайызын азамат өзі жабады. Алайда бұл бағдарлама қаражаттың жеткіліксіз болуына байланысты тоқтап қалған.
"Бұл бағдарламаны келесі жылы іске асыруға өтінім бердік. Алайда, қаржы министрі ол өтінімді қолдамады. Бәрі қаржыға байланысты болып отыр. Қаржы табылған жағдайда бұл механизм "7-20-25" бағдарламасымен қатар жүреді", – деді вице-министр.
