Қазақ тіліне дубляждаған "Моана 2" анимациялық фильмі Қазақстан кинотеатрларында 28 қарашадан бастап көрсетіледі. Алайда, қазақ тіліндегі сеанстардың аздығы және олардың қолайсыз уақытқа қойылғаны тіл жанашырларының ашуын туғызып отыр.
"Disney кинокомпаниясының қазақ тіліне (өз есебінен!) дубляждаған "Моана 2" анимациялық фильмі 28 қарашадан бастап кинопрокатта көрсетіледі. Алайда көптен күткен фильмді қызым екеуіміз жұрт қатарлы премьера күні көре алмаймыз. Себебі қазір 28 қараша күні кинотеатрларда Моананың қазақша сеансына жұмыстан кейін өзіміз қалаған уақытта бара алмаймыз", – деп жазды қоғам белсендісі Бэлла Қасымқызы.
Kino.kz сайтына жүгінген оның мәліметінше, "Моана 2" анимациялық фильмінің 28 қараша күнгі Алматыдағы кестесі төмендегідей:
- Lumiera Cinema (ЦУМ): 16 сеанстың үшеуі ғана қазақша (кешкі соңғы сеанс 17.15-те);
- Kinoplexx 7 Sary Arka: 14 сеанстың 14-і де орысша;
- Kinopark 8 Moskva: 8 сеанстың 8-і де орысша;
- Kinoforum 10 (ТРЦ Forum): 14 сеанстың 14-і де орысша.
Kino.kz сайтына мультфильмнің үш күнгі (28-30 қараша) кестесін ғана жарыққа шығарған. Дегенмен, үш күнде де "Моана 2" анимациялық фильмінің қазақша дубляжына үш сеанс қана берілген.
Оқи отырыңыз: Disney мен Pixar қаржыландырған "Ойжұмбақ 2" фильмі қазақша сөйледі
Еске салайық, биыл Disney компаниясының қазақ тіліне дубляждалған үш жобасы Қазақстан көрермендеріне ұсынылуы тиіс болатын. Маусымда "Ойжұмбақ 2" анимациялық фильмі көрерменге жол тартса, 28 қарашада "Моана 2" мультфильмі көрсетіледі. Сондай-ақ, жыл соңына дейін "Муфаса: Арыстан патша" қазақша сөйлеуі тиіс.
