Қазақстан Республикасы Ұлттық қауіпсіздік комитеті Шекара қызметі жыл басынан бері мемлекеттік шекара арқылы жанар-жағармай материалдарын заңсыз алып өтудің 2400-ден астам фактісінің жолын кесті. Тәркіленген мұнай өнімдерінің жалпы көлемі 300 тоннадан асты, деп хабарлайды ҰҚК.
Ұлттық қауіпсіздік комитетінің мәліметінше, шекаралық бақылау барысында бензин, дизель отыны, керосин және басқа да мұнай өнімдерін елден заңсыз шығаруға бағытталған мыңдаған әрекет анықталған.
"2026 жылдың басынан бері өткізу бекеттерінде жанар-жағармайды заңсыз тасымалдаудың 2400-ден астам фактісі тіркелген. Нәтижесінде жалпы көлемі 300 тоннадан асатын мұнай өнімдері тәркіленді. Ал олардың алдын ала есептелген құны шамамен 60 миллион теңгені құрайды", – делінген хабарламада.
ҰҚК мәліметінше, заң бұзушылыққа жол берген азаматтар қолданыстағы заңнамаға сәйкес жауапкершілікке тартылған.
Оқи отырыңыз: "11,4 млрд теңге ұрлаған". ҰҚК "Проблемалық кредиттер қорының" бұрынғы басшысын ұстады
"Кінәлі адамдар Қазақстан Республикасының қолданылып жүрген заңнамасына сәйкес жауапқа тартылды. Бұл іс-әрекеттер елдің энергетикалық қауіпсіздігін қамтамасыз етуге және жанар-жағармай материалдарының көлеңкелі айналымына жол бермеуге бағытталған", – делінген комитет хабарламасында.
Ведомство шекара арқылы мұнай өнімдерін заңсыз әкетуге қарсы жұмыстардың алдағы уақытта да жалғасатынын атап өтті.