Мүгедек баланың ата-анасына сотта қандай жеңілдік бар?

Бұл жеңілдік Салық кодексінің 616-бап, 13-тармақшасында былай деп жазылған:

"Соттарда мыналар мемлекеттік баж төлеуден босатылады:

13) талапкерлер – (...) бала жасынан мүгедектің, мүгедек баланың ата-анасының бірі – барлық iстер мен құжаттар бойынша".

Сондай-ақ, өзге де әрекеттер жасаған кезде мемлекеттiк баж төлеуден босату туралы Салық кодексінің 622-бабында жазылған: 

"Мемлекеттік баж алымын төлеуден мыналар босатылады:

1) қылмыстық iсте азаматтық талап қоюды қойған кезде;
(...) бала жасынан мүгедектің, мүгедек баланың ата-анасының бірі".

Шымкент қалалық сотының өкілі Қабыл Дүйсенбидің түсіндіруінше, ерекше баланың ата-анасының бірі соттардағы жеңілдікті пайдалану үшін баланың мүгедектігі туралы анықтаманың түпнұсқасын сотқа қажет құжаттармен бірге ұсынуы тиіс.

Соттардағы өтініш түрлері бойынша мемлекеттік баж алымдары мынадай (Салық кодексінің 610-бабы):

"Егер осы тармақта өзгеше белгіленбесе, мүліктік сипаттағы талап арыздардан:

• жеке тұлғалар үшiн – талап қою сомасының 1%;
• заңды тұлғалар үшiн – талап қою сомасының 3%..."