"Жайлы мектеп". Ұлттық жобаға дайындық қалай жүріп жатыр

Фотоны Samruk-Kazyna Construction АҚ ұсынды
Фотоны Samruk-Kazyna Construction АҚ ұсынды

"Жайлы мектептерді" тиімді, ашық және жоспарланған мерзімде құру үшін қандай шаралар қабылдану қажеттігін айтамыз.

Естеріңізге сала кетейік, Қазақстанда "Жайлы мектеп" ұлттық пилоттық жобасы аясында мектептердің құрылысы 2023 жылы басталады.

Жоба не үшін қажет

Жоба оқу орындарының жетіспеушілігі мәселесін жүйелі түрде шешуге, апатты және үш ауысымды мектептерді жоюға бағытталған. Ол 2025 жылға дейін 842 мың оқушыға арналған жаңа форматтағы мектептерді пайдалануға беруді көздейді. Жаңа жайлы мектептердің тұжырымдамалық айырмашылығы – бірыңғай құрылыс стандартын сақтау, балалардың қауіпсіздік шараларын арттыру, пәндік кабинеттермен және зертханалармен толық жарақтандыру, 1-4 сынып оқушылары мен 5-11 сынып оқушылары үшін бөлек оқу блоктары мен спорт залдарының болуы, ерекше білім беру қажеттіліктері бар балалар үшін қажетті жағдайлар және тағы басқалар болады. 

Бұл жаңалықтың барлығы балалардың дағдылары мен құзыреттерін жан-жақты дамытуға бағытталған. Мектеп нысандарын салу және іске қосу процесінде 100 мыңнан астам жұмыс орны ашылады.

ҚР Оқу-ағарту министрі Асхат Аймағамбетов Үкімет отырысында хабарлағандай, жобаны іске асыру үшін үш механизм ұсынылды: МЖӘ шеңберінде мектептер салу, жеке инвесторлардан талаптарға сай салынған мектеп ғимараттарын сатып алу және бірыңғай оператор арқылы мектептердің мақсатты құрылысы.

2022 жылдың 28 қыркүйегінде реформалар жөніндегі Жоғары Кеңестің кезекті отырысында мемлекет басшысы Қасым-Жомарт Тоқаев Samruk-Kazyna Construction АҚ атынан мектеп салу бойынша бірыңғай тапсырыс берушіні айқындау туралы Үкіметтің ұсынысын қолдады.

Қазір Samruk-Kazyna Construction АҚ "Жайлы мектеп" Ұлттық пилоттық жобасын іске асыру аясында белсенді дайындық жұмыстарын жүргізуде.

Дайындық жұмыстары қалай жүріп жатыр?

1. Жер учаскелерінің алдын ала тізімі алынды.

Құрылысы 2023 жылы басталатын 226 мектептің ішінен 221 мектеп бойынша жер учаскелерін жергілікті атқарушы органдар (ЖАО) және ҚР Оқу-ағарту министрлігі (ҚР ОАМ) айқындаған, бес учаске бойынша жұмыс әлі жүргізілуде.

Жобалау алдындағы зерттеулер жүргізе отырып, Samruk-Kazyna Construction АҚ учаскенің әлеуетін зерттейді және осы аумақтарды мектеп құрылысына пайдалану ерекшелігін талдайды. ЖАО-мен бірлесіп жер учаскелерін уақытша инженерлік-коммуникациялық инфрақұрылымға, оның ішінде құрылысты бастау үшін қажетті сумен жабдықтауға, су бұруға, электрмен жабдықтауға қосу мүмкіндіктері қаралады.

2. Бес климаттық аймақ үшін мектеп жобаларының жеті түрі бойынша (300, 600, 900, 1200, 1500, 2000, 2500 орын) форэскиздер (тұжырымдамалар) әзірленді және ҚР ОАМ келісуге жіберілді 

Ауқымды міндеттерді сапалы және белгіленген мерзімде орындау үшін кейіннен байланыстыра отырып типтік жобалауды әзірлеу жоспарлануда

Егер "Жайлы мектеп" ұлттық жобасын іске асыру ауқымында жобалау шығындарын бағалайтын болсақ, онда біржолғы жобалаумен салыстырғанда типтік жобалау ақшалай қаражаттың шамамен 55% үнемдеуге мүмкіндік береді.

ҚР Индустрия және инфрақұрылымдық даму министрлігі Құрылыс және тұрғын үй-коммуналдық шаруашылық істері комитетінің үлгілік жобаларын Банкке қосу жобалау-сметалық құжаттаманы (ЖСҚ) кейіннен енгізу жобаларын қайта пайдалануға мүмкіндік береді. Нәтижесінде өндіріс мерзімі қысқарады, құрылыс пен өндіріс процесі жеделдетіледі. Типтік дизайн заманауи технологиялық және инженерлік шешімдерді ағынға қоюға мүмкіндік береді.

Осылайша, барлық 401 мектепте бірыңғай стандарт бойынша қалаларда да, ең шалғайдағы ауылдық елді мекендерде де оқушылар үшін барынша қолайлы және тиімді жағдайлар жасалатын болады.

3. Жобаны іске асыру мониторингі бойынша ақпараттық жүйені іріктеудің белсенді процесі жүріп жатыр.

Бұл жүйе ашықтықты қамтамасыз етеді және еліміздің кез келген азаматына мектеп құрылысының барысын онлайн режимде қадағалауға, салынып жатқан мектеп бойынша қызықтыратын құжаттармен танысуға мүмкіндік береді.

4. ЕРС келісім-шарттарының жобалары (жобалау, техникалық жабдықтарды жеткізу, құрылыс) қазір келісу рәсімінен өтуде. 

Бұл жоғары жұмыс қарқынын қамтамасыз етуі тиіс. Осылайша, бас мердігер ұзақ мерзімді жабдықты қатар сатып алып, құрылыс жұмыстарын жүргізуге мүмкіндік алады.

5. Мектептерді жабдықтауға арналған оқу, корпустық және жұмсақ жиһаздардың алдын ала тізімі анықталды.

"Атамекен" ҰКП және ҚР Жиһаз және ағаш өңдеу өнеркәсібі кәсіпорындарының қауымдастығымен отандық тауар өндірушілерді тарту бойынша келіссөздер жүргізілуде.

Samruk-Kazyna Construction АҚ

ҚР құрылыс саласын дамытуға жәрдемдесуге бағытталған квазимемлекеттік компания мәртебесіне ие. Компания Дағдарысқа қарсы бағдарламаның, "Нұрлы жер" бағдарламасының жалдамалы және коммерциялық тұрғын үй бағыттары бойынша операторы бола отырып, Түркістан облысында және Астана қаласында әлеуметтік маңызы бар нысандары құрылысын басқаруда тәжірибесі бар. Қазіргі уақытта компания тұрғын үй құрылысы объектілеріне, отандық құрылыс материалдарын өндіретін зауыттарға инвестициялық қызметті жүзеге асырады, сондай-ақ ел өңірлерінде ескі тұрғын үйлерді жаңарту бағдарламасы шеңберінде жобаларды іске асырады.

Жаңалықты жарнамасыз оқыңыз. iOS және Android жүйесіне арналған informburo.kz мобильді қосымшасын жүктеңіз.

Тарату:

  Егер мәтінде қате болса, оны белгілеп, Ctrl+Enter батырмасын басыңыз

  Егер мәтіндегі қатені смартфонда көрсеңіз, оны белгілеп, «Қатені хабарлау» батырмасын басыңыз

Серіктестер жаңалықтары