Бүгін түнде Алматыда қалың қар жауып, қала ақ қарға оранды. Көлік кептелісі күшейіп, жаяу жүру қиындады. Алматыдан ұшатын да, Алматыға ұшып келетін де рейстер кешігіп жатыр. Кейбірі тоқтатылды.
Осы орайда Informburo.kz фотографы Алматыны аралап, қар басқан қала көшелерін фотоға түсірді.
Алматыға бір түнде 14 см қар жауған. Ал Шымбұлақта қар қалыңдығы 20 сантиметрге, Каменск үстіртінде 22 сантиметрге жетті. Бұл – айлық норманың төрттен бірі.
Қардың қаншалық қалың екенін қар астында қалған мүсіндер мен ескерткіштерден аңғаруға болады. Абай атындағы Қазақ ұлттық опера және балет театрының жанындағы Жамбылдың ескерткіші ақ ұлпаға оранған.
Үлкен алаңдарда Жаңа жыл мерекесіне орай безендірілген шыршалар мен декорацияны да қар басқан.
Көшеде қар тазаланбаса адамдардың да, көліктің де жүруі қиындайды. Коммуналдық қызмет таңғы төртте қар тазалауға кіріскен.
Қала көшелері мен жолдарды тазалауға 475 арнайы техника мен 1 115 жұмысшы жұмылдырылды. Қар жауа бастаған сәттен бері 194 құмсепкіш техниканың күшімен көктайғаққа қарсы материал себіліп жатыр.
75 шағын техниканың көмегімен тротуарлар, қоғамдық орындар, әлеуметтік маңызды нысандар, тұрақ "қалталары" тазаланып жатыр. Аялдамалар мен жаяу жүргіншілер өткелдері де ұмыт қалған жоқ. Көшеде күрек ұстап, қар тазалап жүрген жұмысшылар аз емес.
Ауа райына байланысты Алматы халықаралық әуежайында кейбір рейстер кейінге шегеріліп жатыр. Олардың қатарында "Алматы-Астана", "Алматы-Шымкент" және өзге де бағыттар бар.
2GIS картасында бірнеше адам жолда көлік апаты орындарды белгілеген. "Қар жауып еді, кептеліс басталды" деп жазғандар да бар.
Алматы қаласының полиция департаменті көлігін жол жиегіне ретсіз қоятындар қар шығаруға және жолды тазалауға айтарлықтай қиындық туғызатынын хабарлады. Сондықтан жүргізушілерді бұл мәселеге жауапкершілікпен қарауға шақырды.
Сақтық үшін жүргізушілерге жылдамдықты асырмау, көліктер арасында қашықтықты сақтау және қар тазалау жұмыстары жүріп жатқан аумақтарға көлік қоймауға кеңес етіледі. Жаяу жүргіншілер де, әсіресе, тұманда, тайғақ жолдарда, жолдан өткенде сақ болуы қажет.
Қала көшелерін 150-ге жуық патрульдік полиция жасағы мен әкімшілік полицияның мамандандырылған батальоны күзетеді.
"Қазгидромет" болжауынша, Алматыда бүгін түнде температура -13°С-қа дейін суиды. 13 қаңтарға дейін қалада жауын-шашын жаумайды. Алдағы күндері күн ашық болады.
