Елімізде "Елбасы жылуы" акциясы аясында 681 отбасыға көмек берілді

"Елбасы жылуы" қайырымдылық акциясы аясында Алматы, Ақмола, Маңғыстау, Шығыс Қазақстан, Солтүстік Қазақстан және Түркістан облысынан 681 отбасы азық-түлік пен алғашқы қажетті тауарлар алды. Бұл Нұрсұлтан Назарбаев қоры мен "Дегдар" қоры бірлесе ұйымдастырған "Елбасы жылуы" қайырымдылық акциясының нақты нәтижесі болып табылады, деп мәлімдейді Нұрсұлтан Назарбаев қорының баспасөз қызметі. 

Апта бұрын бастау алған акция соғыс ардагерлері мен тыл еңбеккерлерін, аз қамтылған, көпбалалы және ерекше қажеттілігі бар балаларды тәрбиелеп отырған отбасыларды қамтыды. Әр отбасы 132 келі тартатын тауар (ұн, картоп, жеміс, күріш, қарақұмық, шай, қант, күнбағыс майы, гигиеналық құрал т.б.) алды.

Оқи отырыңыз: Нұрсұлтан Назарбаевтың бастамасымен "Елбасы жылуы" қайырымдылық жобасы қолға алынды

"Кез-келген уақытта халықтың бауырмалдығы, мейірімділігі, қайырымдылығы қиындықтарды еңсеруге көмектеседі, бұл мұқтаж жандарға көмектесу үшін елді біріктіруге себепші. Коронавирус пандемиясы мұқтаж жандарға қолдау көрсетуге көпшіліктің дайын екенін байқатты. "Елбасы жылуы" акциямызды қолдағаны үшін "Дегдар" қорына, аймақтық еріктілерге алғыс айтамыз, бірнеше мың жан қысқа мерзімде алғашқы қажетті тауар алды. Тұрғындар алғыс тарын білдіріп жатыр", – дейді Нұрсұлтан Назарбаев қорының атқарушы директорының орынбасары Әлкей Марғұланұлы.

Алдағы уақытта мұндай акцияларды өткізу аймақтарда одан әрі жалғасын табады.